भ्रम होइन, वास्तविकता बुझौँ : विपद्को समयमा स्थानीय सरकार जनताको साथमै छविपद्को समय संवेदनशील समय हो। यस्तो बेला नागरिकमा सही सूचना पुग्नु र कुनै पनि विषयमा तथ्य नबुझी भ्रम फैलिन नदिनु सबैको साझा जिम्मेवारी हो।शिवपुरी गाउँपालिकामा पछिल्लो भारी वर्षाका कारण विभिन्न स्थानमा बाढी तथा पहिरोले क्षति पुर्‍याएको विषयमा गाउँपालिकाको चासो र भूमिकामाथि सामाजिक सञ्जालमा विभिन्न टिप्पणीहरू देखिन थालेका छन्। स्थानीय सरकारले विपद्को समयमा चासो दिएन, स्थलगत रूपमा पुगेन वा प्रभावित नागरिकको समस्यालाई बेवास्ता गर्‍यो भन्ने किसिमका भ्रम सामाजिक सञ्जालमा देखिनु दुःखद् विषय हो।यस विषयमा यथार्थ बुझ्न जरुरी छ।गाउँपालिका अध्यक्ष हाल विदेश भ्रमणमा रहनुभएको अवस्थामा स्थानीय सरकारको नेतृत्व तथा जिम्मेवारी उपाध्यक्ष श्री वीरबहादुर तामाङज्यूको हातमा रहेको छ। उहाँ पनि लामो समयदेखि गम्भीर स्वास्थ्य समस्याबाट गुज्रिनुभई भर्खरै स्वास्थ्यलाभ गर्दै हुनुहुन्छ। यस्तो व्यक्तिगत कठिनाइका बाबजुद पनि विपद्को समयमा स्थानीय सरकार आफ्नो जिम्मेवारीबाट पछि हटेको छैन।पहिरो तथा बाढीबाट प्रभावित क्षेत्रमा स्थानीय सरकारको तर्फबाट स्थलगत निरीक्षण बिहानै स्थानीयवासीसँगै पुगेर गरिएको थियो। प्रभावित क्षेत्रको वास्तविक अवस्था बुझ्ने, नागरिकका समस्या सुन्ने र आवश्यक समन्वय तथा सहयोगका लागि पहल गर्ने काम भइरहेको थियो।पछि सम्बन्धित मन्त्रीज्यूको स्थलगत निरीक्षणका क्रममा पनि सम्बन्धित वडाका अध्यक्षको उपस्थिति र समन्वय रहेको थियो। त्यसैले कुनै एउटा क्षणको दृश्य वा अपूर्ण जानकारीका आधारमा ‘स्थानीय सरकारले चासो दिएन’ भन्ने निष्कर्ष निकाल्नु तथ्यसंगत हुँदैन।यसको अर्थ स्थानीय सरकारका काममा प्रश्न उठाउन पाइँदैन भन्ने होइन। जनताको सरकार भएकाले स्थानीय सरकारलाई प्रश्न गर्ने, खबरदारी गर्ने र अझ प्रभावकारी काम गर्न सुझाव दिने अधिकार नागरिकसँग छ। तर प्रश्न तथ्यमा आधारित हुनुपर्छ, भ्रममा होइन।विपद्को समयमा स्थानीय सरकार, जनप्रतिनिधि, सुरक्षाकर्मी, कर्मचारी, स्थानीयवासी तथा सम्बन्धित निकायबीचको समन्वय अत्यन्त आवश्यक हुन्छ। त्यसैले अहिले आरोप–प्रत्यारोपभन्दा पनि प्रभावित नागरिकको उद्धार, राहत, सुरक्षित व्यवस्थापन र क्षतिग्रस्त संरचनाको पुनःस्थापनामा सबैको ध्यान केन्द्रित हुन आवश्यक छ।शिवपुरी गाउँपालिकाका सम्पूर्ण नागरिकमा स्पष्ट जानकारी गराउन चाहन्छौँ—स्थानीय सरकार सधैँ तपाईंहरूको सेवामा कटिबद्ध छ। नागरिकलाई परेको दुःखलाई आफ्नो दुःखका रूपमा लिएर आवश्यक सहयोग, समन्वय र पहल गर्न स्थानीय सरकार प्रतिबद्ध छ।त्यसैले सामाजिक सञ्जालमा आएका हरेक सूचना सत्य हुन् भन्ने नठानौँ। कुनै विषयमा जिज्ञासा वा गुनासो भए सम्बन्धित जनप्रतिनिधि तथा गाउँपालिकासँग प्रत्यक्ष जानकारी लिऔँ। भ्रम फैलाएर होइन, तथ्य बुझेर र एकअर्कालाई साथ दिएर मात्रै विपद्को सामना गर्न सकिन्छ।आजको आवश्यकता कसलाई दोष दिने भन्ने होइन, पीडित नागरिकलाई कसरी साथ दिने भन्ने हो।भ्रम होइन, सत्य फैलाऔँ।आरोप होइन, सहकार्य गरौँ।विपद्को समयमा राजनीति होइन, मानवता र जिम्मेवारीलाई प्राथमिकता दिऔँ।स्थानीय सरकार तपाईंहरूको सेवामा हिजो पनि थियो, आज पनि छ र भोलि पनि निरन्तर कटिबद्ध रहनेछ।